Жамбыл облыстық қазақ драма театры

+7 (7262) 45-29-68
+7 (7262) 45-79-70
Тараз қ, Абай проспект, 115

Ашаршылық пен саяси қуғын-сүргін құрбандарын еске алу күні - Қазақстан Республикасы Президентінің Жарлығымен саяси қуғын-сүргін құрбандарын еске алу жылы болып аталған 1997 жылдан бастап атап өтіледі.

Осыған орай Жамбыл облыстық қазақ драма театры ұжымы бір кісідей атсалысып, қуғын-сүргінді бастан кешкен ата-бабаларымызды еске алды. Саяси қуғын сүргін мемориалы алдына гүл шоуюқтарын қойып, жалпы театр ұжымына деректі фильм көрсетілді.

Жамбыл облыстық қазақ драма театрының шығармашылық ұжымы 1-8 маусым күндері Татарстан Республикасының ҚАЗАН қаласында өткізілетін «НАУРУЗ» Халықаралық театр фестиваліне Қ.Қасымовтың «ҚЫЗ ЖІБЕК» саунд-драмасымен қатысуға шақыру алып, Татарстанға шығармашылық сапармен жол жүріп кетті.

Ақ жол, Сіздерге, Жамбылдық өнер қырандары!

Айта кетейік, осы сапар алдында ғана Жамбыл облыстық қазақ драма театрының ұжымы Ақтөбе қаласында өткен Халықаралық театр фестиваліне Б.Жандарбековтің «Томирис» атты экспериментальді драмасымен қатысып, тарихи қойылымдар бойынша арнайы номинацияға ие болып, қайтқан болатын.

Бүгін театрымызда орыс театрының ұжымымен бірге "діни экстремизм мен терроризмге қарсы күрес" тақырыбында дөңгелек үстел өтті. Аталған отырыста Жамбыл облысы әкімдігінің дін істері жөніндегі басқармасының мүшесі Джакипов Ерзат Джаскаебаевич сөз сөйледі. Қазақ және орыс театрларының директор орынбасарлары Қанат Агадилов пен Сон Валерия Михайловна театр іргесінде діни экстремизм мен терроризмге қарсы күрес мақсатында атқарылып жатқан жұмыстар, іс шаралар мен сахналық қойылымдарды баяндады. Әсіресе болашағымыз жастарға кеңінен түсіндіріліп, ақ пен қараны ажырата білсін деген мақсатта кеңінен айтылды. Дәл осы тақырыпта театр ұжымына белгілі уақыт ішінде осындай жиналыс, түсіндіру жұмыстары өтеді.

Жамбыл облыстық қазақ драма театры қасиетті Рамазан айында ауыр науқаспен ауыратын екі жарым жастағы Аруназ Саматқызы атты жас сәби қыздың емделуіне өз үлесін қосып, қаржылай көмек көрсету мақсатында 2019 жылдың 25 мамыры, сенбі күні сағат 17.00-де театрдың Үлкен сахнасында көрермендер назарына Қ.Шаңғытбаев пен Қ.Байсейітовтің арман қуған жастар мен ауыл өмірінің қызықты оқиғалары баяндалатын «Беу, қыздар-ай!» атты комедиясын ұсынды.

Аталған қайырымдылық қойылымға сатылған билеттерден түскен қаржы толықтай екі жарым жастағы науқас бүлдіршін Аруназ Саматқызының емделуі үшін жинақталып жатқан қаржы қорына қосылды.

Бүгін Жамбыл облыстық қазақ драма театры сахнасында Спандиярбек Мұқышевтің "Апандағы адамдар" трагикомедиясының сдачасы өтті.

Жамбыл облыстық қазақ драма театрының актрисасы, әріптесіміз ИНДИРА МҰСТАФАЕВА Мәдениет және өнер қызметкерлері күніне орай, театр өнеріндегі зор жетістіктері үшін Жамбыл облыстық мәдениет, архивтер және құжаттама басқармасының басшысы Дүйсенәлі Бықыбаевтың Құрмет грамотасымен марапатталды.

Индира Мұстафаева Жамбыл облыстық қазақ драма театрындағы актрисалық жолын ә дегеннен-ақ, жарқ еткен жанды бейнелерді сомдаудан бастап, бүгінде көрермендерінің сүйікті актрисасына айналған талантты өнер иесі. Ол, қазіргі кезде С.Балғабаевтың «Ең жақсы еркегінде» - Гүлмайданды, Т.Нұрмағамбетовтің «Аса мәртебелі Сейфінде» - Мира атты қызды, Қ.Ысқақ пен Ш.Құсайыновтың «Қазақтарында» - биші қызды, А.Бекбосынның «Домалақ енесінде» - Келін, И.Сапарбайдың «Сыған серенадасында» - Сыған әйелдер бейнелерін, сондай-ақ, басқа да бірқатар қойылымдарда негізгі және көпшілік сахнасы рольдерін сомдап келеді.

Индира сонымен қатар, балаларға арналған қойылымдарда үнемі басты рольдерден көрінеді. Мәселен, «Құлыншақ пен бөлтірікте» - Ана бие, «Жақсы шәкіртте» - Құмырсқа, «Қошқар мен текеде» - Қасқыр, Қой, С.Пірмановтің «Алтын жұмыртқасында» - Бақ құсы, «Ақ күшіктің туған күнінде» - Тауық және тағы басқа бірқатар ертегілерде бекітілген бейнелерді мейлінше шебер орындап келеді.

Жамбыл облыстық қазақ драма театрының талантты актері, әріптесіміз ЖАНДАР ҚЫРЫҚБАЕВ Мәдениет және өнер қызметкерлері күніне орай ұйымдастырылған Жамбыл облысының әкімі А.Мырзахметовтің қабылдауына қатысып, театр өнеріндегі зор жетістіктері үшін өңір басшысының Алғыс хатымен марапатталды және сыйақы ретінде 200 мың теңге көлеміндегі сертификатқа ие болды.

Жандар Қырықбаев 83 жылдық тарихы бар Жамбыл облыстық қазақ драма театрында өшпес іздерін қалдырған кешегі Шәріпбай Сәкиев, Мұхаметқали Табанов, Қарабай Сатқанбаев, Спандияр Мұқышев және т.б. аса талантты алдыңғы буын ағаларының асқақ рухты жолдарын жалғастыруға барынша талпынып келе жатқан дарын иесі.

Ол, өзінің алғашқы актерлық қадамынан-ақ болашағынан зор үміт күтттіретін талантты актер екендігін танытты. Жандар Қырықбаев соңғы жылдары М.Әуезовтің «Еңлік-Кебек» трагедиясындағы Есен образын барынша шынайы сомдап, әсерлі шығарды. Сондай-ақ, И.Сапарбайдың «Сыған серенадасы» сазды драмасында Сағыныш қыздың күйеу жігіті Абзалдың ролін өмірдегі жанды бейнеден аудырмай, аса әсерлі етіп сомдады. Ә.Оразбековтің «Бір түп алма ағашы» мелодрамасында Зарқымбек образын шебер жасады. Қ.Жүнісовтің «Алғашқы махаббат» комедиясындағы басты кейіпкерлердің бірі Ержан бейнесін үлкен шеберлікпен сәтті шығарып, өнерсүйер қауымның ықыласына бөленді. Қ.Байсейітов пен Қ.Шаңғытбаевтың «Беу, қыздар-ай!» комедиясында қиялилау суретші Сұлтанды ойнаған артист Жандар Қырықбаевтың актерлік шеберлігіне көрермені тіптен ерекше тәнті болды. Мар Байжиевтің «Қалыңдық пен күйеу» драмасында Күйеу жігіттің ролінде ойнап, көрермен көзайымына айналды. Қазақ хандығының 550 жылдығына арналған Қ.Ысқақ пен Ш.Құсайыновтың «Қазақтар» тарихи драмасында Тойкелді, Ә.Файзуллаұлының «Алтын Адам» аңыз ертегісінде атты әскер бейнесін шынайы суреткерлікпен сомдап шықты. Сонымен қатар, балаларға арналған көптеген ертегі-қойылымдарда бекітілген рольдерді асқан шеберлікпен сомдап, көрермендерін тәнті етіп келеді.

Ж.Қырықбаев бірнеше фильмдерге түсіп, киноактер ретінде де танылып жүрген өнер иесі.

Жамбыл облыстық қазақ драма театрында мектеп қабырғасында оқитын жас бозбала жігіттің ең алғашқы махаббат сезімін жеткізуге құрылған «Алғашқы махаббат» атты қызықты комедия сахналанды.

Комедия оқиғасында Қанат атты жоғары сыныпта оқитын жас бозбала жігіт мектепке қызметке жаңа келген өздерінің сынып жетекшісі, жас мұғалима қызға деген өзінің алабөтен сезімін байқайды... Ол – оқушы жігіттің мұғалимаға деген - алабұртқан алғашқы махаббат сезімі еді. Жігіт жас мұғалимаға деген өзінің осынау бейкүнә албырт сезімін үнемі сыршыл жырларымен жеткізеді...

Қойылымдағы мектеп өмірінің кіршіксіз сәттері, алғашқы махаббат, бейкүнә сезімдер суреттелетін қызықты оқиғалар көрермен жанын бірден баурап алады. Пьеса авторы – Қанат Жүнісов. Қойылым режиссері - Анар Сағымбекова.

Жамбыл облыстық қазақ драма театрында 2019 жылдың 25 мамыры, сенбі күні сағат 17.00-де Қ.Шаңғытбаев пен Қ.Байсейітовтің арман қуған жастар мен ауыл өмірінің қызықты оқиғаларына құрылған «Беу, қыздар-ай!» атты комедиясы қайырымдылық қойылым ретінде көрсетіліп, одан түскен қаржы ауыр науқаспен ауыратын екі жарым жастағы Аруназ Саматқызы атты жас сәби қыздың емделуі үшін жинақталып жатқан қаржы қорына қайырымдылық ретінде қосылатын болады. Қасиетті Рамазан айында жас сәбиді ауыр науқастан арашалап қалу үшін қайырымдылық жасауға асығайық, ағайын!

Қойылымға қайырымдылық билеттерін сатып алып, кіре аласыздар! Қойылым Жамбыл облыстық қазақ драма театрының Үлкен залында болады. Алдыңғы орындарға 1 билет бағасы – 1 мың теңге, артқы орындарға – 500 теңге.

Билеттер театр кассасында және жеке таратушылар арқылы сатылады. Байланыс үшін телефондар: 8-747-913-75-70; 8-747-739-69-95; 8-707-487-32-89 немесе 8 (726-2) - 45-29-68.

Бүгін театрымыз көшпелі қойылыммен Тараз қаласының #23 балабақшасында С. Пірмановтың "Алтын жұмыртқа" ертегісін ұсынды. Балабақша бүлдіршіндерінің көңілдерінен шықты деп сенеміз.

Бүгін театрымыздың кіші залының сахнасында бүлдіршіндер назарына С. Пірмановтың "Алтын жұмыртқа" ертегісі ұсынылды, бүлдіршіндер жақсы демалып қайтты деп сенеміз.

Беу қыздар-ай! комедиясы көпшілік назарына қайта ұсынылып, тағы да көрерменнің зор ықыласына бөленды. Комедия авторлары Қанабек Байсейітов пен Қуандық Шаңғытбаев. Қоюшы-режиссері Рүстем Жаныаманов.

Бүгін Жамбыл облыстық қазақ драма театры, болашағымыз жастардың тәлім тәрбиесі мен діни сауттылығын, өмірлік көзқарастарының жақсы болуы мен ақ пен қараны ажырата алсын деген мақсатта, ерекше тәрбиелік мәні бар қойылымдардың бірі Б. Айдарбековтың "Тағдыр тәлкегі" мұңлы драмасын жас көрермендер назарына ұсынды.

Бүгін театрымыздың сахнасында бүлдіршіндер назарына С. Пірмановтың "Алтын жұмыртқа" ертегісі ұсынылды, бүлдіршіндер жақсы демалып қайтты деп сенеміз.

АТА-АНАЛАР  МЕН  МЕКТЕП  БАСШЫЛАРЫНЫҢ  НАЗАРЫНА! «ОҚУШЫЛАРДЫ  ТЕАТРҒА  АПАРУ -  АҚША  ЖИНАУ ЕМЕС...» 

Құрметті ата-аналар мен ардақты педагогтар қауымы және «Тараз. Открытый диалог» тобының модераторы, Темурлан Турдалин мырза!

Әлеуметтік желілердегі - «Тараз. Открытый диалог» тобының 2019 жылдың сәуір айындағы постында жазылған: «Мектептерде  әр түрлі мақсаттарға заңсыз ақша  жиналады» деген  пікірлер  оқушылардың  театр сияқты өнер ошақтарына мәдени демалуға келулеріне еш  салқынын  тигізбеуі  тиіс.

Бала деген – өте әсершіл, кез-келген икемге тез иілгіш. Осы себепті жас жеткіншектердің  сабақтан  тыс уақытта, бір мезгіл,  өзінің  жан-жақты дамуына да, болашағына да пайдалы саналатын  көпшілік шараларға  барып, қатысып,  мәдениет, өнер, спорт әлемі сыйқырларынан  өзіндік  рухани азық  алуларына  қолдау көрсету – ата-аналардың да,  педагог қауымының  да басты парыздарының бірі болса керек...

Театр – балалар үшін рухани өсуге, әдемілік пен әдептілікке тәрбиелейтін бірден-бір эстетикалық өнер ордасы. Өресі биік өнер де,  көрерменге көрікті ой салар  өнер де  - осы, театр!

Ғұлама жазушы Мұхтар Әуезов театрды – «Ең сымбатты өнер» деп сипаттаса, Ғабит Мүсірепов  - «Театр – хас сұлудың көз жасындай мөлдір өнер» деп тамсанады...

Ендеше, құрметті ата-аналар мен ардақты педагогтар қауымы!

  Оқушылардың  театрға келуі  –  босқа ақша жинау емес... Ол – ақша жинаудан да үлкен мақсатты  дүние.  Оны бүгін ескермесек, ертең кеш болары хақ. 

4 мамыр күні өткен латын әліпбиімен кешенді диктант жазу шарасына Жамбыл облыстық қазақ драма театрының қызметкерлері де белсенді ат салысты. Елбасының «Ұлы даланың жеті қыры» атты мақаласынан үзінді ретінде берілген «Алтын адам» тақырыбындағы диктантты жазуға театрдың 24 – 60 жас аралығындағы қызметкерлері қатысты.

Мәдениет қызметкелері арасында өткен футболдық турнирде Театрымыздың жігіттері жүлделі 1 орынға ие болды. Жеңістеріңіз құтты болсын жігіттер!

2 мамыр күні Жамбыл облыстық қазақ драма театрында мектеп қабырғасында оқитын жас бозбала жігіттің ең алғашқы махаббат сезімін жеткізуге құрылған «Алғашқы махаббат» атты қызықты комедия сахналанды.

Комедия оқиғасында Қанат атты жоғары сыныпта оқитын жас бозбала жігіт мектепке қызметке жаңа келген өздерінің сынып жетекшісі, жас мұғалима қызға деген өзінің алабөтен сезімін байқайды... Ол – оқушы жігіттің мұғалимаға деген - алабұртқан алғашқы махаббат сезімі еді. Жігіт жас мұғалимаға деген өзінің осынау бейкүнә албырт сезімін үнемі сыршыл жырларымен жеткізеді...

Қойылымдағы мектеп өмірінің кіршіксіз сәттері, алғашқы махаббат, бейкүнә сезімдер суреттелетін қызықты оқиғалар көрермен жанын бірден баурап алады. Пьеса авторы – Қанат Жүнісов. Қойылым режиссері - Анар Сағымбекова.