Жамбыл облыстық қазақ драма театры

+7 (7262) 45-29-68
+7 (7262) 45-79-70
Тараз қ, Абай проспект, 115

2018 жылдың 9 қарашасы күні Жамбыл облыстық қазақ драма театрында Қазақстан Жазушылар одағының мүшесі, ақын, жазушы-драматург, театр директоры, Болат Бекжановтың 60 жас мерейтойына арналған «Құс жолынан жыр төктім» атты поэтикалық кеш өтті.

Мерейтой кеші алдында театр фойесінде автордың баспадан жаңа шыққан «Болмайды ғой», «Редактордың қойын дәптері», «Өмір-драма», «Сахнадан сыр айтамын», «Құс жолынан жыр төктім», «Көз көргендер» атты алты томдық кітабының тұсаукесері болды.

Автор кітаптарының тұсаукесер шарасына Қазақстан Жазушылар одағы төрағасының орынбасары, Халықаралық әдеби «Алаш» сыйлығының лауреаты, ақын Бауыржан Жақып, филология ғылымдарының докторы, Қазақстан Ұлттық Ғылым академиясының корреспондент мүшесі, профессор, Қазақ Ұлттық Университеті жанындағы «Абайтану» ғылыми орталығының директоры Жанғара Дәдебаев, Қазақстан Республикасының еңбек сіңірген қайраткері, Халықаралық «Алаш» әдеби сыйлығының лауреаты, Шешенстан республикасының «Намыс» орденінің иегері, ақын Рафаэль Ниязбеков, Қазақстан Жазушылар одағының мүшесі, ақын Айша Көпжасарова, автордың алты томдық кітабының демеушісі, Алматы «Нұрлы Әлем» баспасының директоры, композитор Жарылқасын Дәулет қатысты.

Алты томдықтың тұсаукесерінде Б.Бекжановтың әріптес ағалары мен замандастары, шәкірттері сөз сөйлеп, мерейтой иесін алпыстың биігіне шыққан мерейлі жасымен, өтіп жатқан шығармашылық кешімен және жаңа алты томдық кітаптарының тұсаукесерімен құттықтады.

Одан соң, театр сахнасында болған «Құс жолынан жыр төктім» атты поэтикалық қойылымда Болат Бекжановтың өлеңдеріне жазылған белгілі сазгерлердің әндеріне, автордың өз әндеріне кезек берілді. Сондай-ақ, театр артистері Б.Бекжановтың шығармашылық өнер жолын бейнелейтін сахналық қойылым көрсетті.

Соңынан мерейтой иесін әр тараптан құттықтау шаралары өтті.

2018 жылдың 3 қарашасы күні Жамбыл облыстық қазақ драма театрында өмір мен өнер айдынында қатар жүзген белгілі театр және кино актерлері, ерлі-зайыпты қос өнер жүйрігі, Қазақстан Республикасының мәдениет қайраткері Жұмахан Әбдіқадыровтың – 65 жасқа, жұбайы, Қазақстан Республикасының еңбек сіңірген қайраткері, актриса Гүлшат Қыпшақованың 60 жасқа толуларына орай, қос өнер иесінің мерейтойларына арналған «Өмір-өнер дастаны» атты шығармашылық кеш өтті.

Жамбыл облыстық қазақ драма театрында 2 қараша күні жазушы Б.Ұзақтың «Жандауа» атты трагедиясын сахналады.

Жамбыл облыстық қазақ драма театры 31 қазан күні сағат 12:00 де М. Ахмановтың, бүлдіршіндерге арналған "Екі дос" ертегісін сахналады.

30 қазан күні сағат 18.30-да Жамбыл облыстық қазақ драма театрында тірісінде-ақ, «Адамзаттың Айтматовы» атанған, әйгілі классик-жазушы Шыңғыс Айтматовтың 90 жылдығына арнап жазылған драматург Байғали Есеналиевтің «Таң сыры» атты драма-элегиясының кезекті қойылымы болды.

Драманың қоюшы-режиссері – Ш.Айтматов атындағы Халықаралық сыйлықтың лауреаты, белгілі режиссер Қуандық Қасымов. Қоюшы-суретшісі – ҚР Мәдениет саласының үздігі Рахат Сапаралиева.

Драмаға Шыңғыс Айтматов өмірінің кейбір, көпшілікке беймәлім кезеңдері мен тұстары, сондай-ақ, жазушының «Боранды бекет», «Ақ кеме», «Жәмилә» сияқты бірқатар шығармаларындағы басты кейіпкерлердің бейнелері арқау болған.

Ақ күшіктің туылған күні

Жамбыл облыстық қазақ драма театрында 29 қазан күні жазушы-драматург Елен Әлімжанның «Әйелдер бір іс бастады» атты комедиясының тұсаукесер қойылымы болды.

Жазушы-драматург Елен Әлімжанның комедия жанрындағы драмалық шығармалары оқырманға да, театр көрермендеріне де бұрыннан таныс.

Жамбыл облыстық қазақ драма театрында Ел-ағаның «Бір қазаққа бір қатын!», «Тақталас», «Жанұран» комедиялары, сондай-ақ, «Жанталас», «Төлеби» атты драмалары қойылып, ұзақ уақыт сахнадан түспей жүргенін өнерсүйер қауым жақсы біледі.

«Әйелдер бір іс бастады» комедиясы – жазушының соңғы жылдары жазған драмалық шығармаларының бірі.

Жазушының сахнаға жаңа дайындалған бұл комедиясының оқиғасында ерлі-зайыптылар арасында жиі кездесетін бір-біріне сенбеу, бірін-бірі қызғану сияқты сезімдердің шарықтау шегіне жетіп, күлкілі аяқталуы баяндалады.

Осындай күлкілі оқиғаны өрбітуге мұрындық болған Еңлікгүл (арт. Гауһар Сұлтанбекова), Гүлбибі (арт. Индира Мұстафаева), Аяжан (арт. Назым Ақылова) есімді үш келіншек ерлерінің адалдығына көз жеткізбек болып, кейде адам баласының ойына келмейтін қулыққа барып, күйеулерін сынап, тексергендері ойнақы әзілге құрылған іс-әрекеттермен баяндалады.

Үш келіншектің бейнесін жасаған артистер Гауһар Сұлтанбекова, Индира Мұстафаева, Назым Ақылова және олардың күйеулерінің рольдерін сомдаған артистер: Мейірбек Есімбекұлы, Жасұлан Қамбатыров және Абзал Дәулетбақовтар өз кейіпкерлерінің іс-қимылдары мен ішкі психологиялық көңіл-күйлерін барынша сенімді көрсете білді.

Жамбыл облыстық қазақ драма театры 22 қазан күні, Б. Айдарбековтың "Тағдыр тәлкегі" мұңлы драмасын сахналады.

Жамбыл облыстық қазақ драма театры 16 қазан күні Абай Құнанбаев атындағы №26 мектебіне М. Ахмановтың "Екі дос" ертегісін көшпелі қойылыммен сахналады.

Жамбыл облыстық қазақ драма театры 11 қазан күні Сарыкемер ауылы "Теремок" және "Мұрагер" балабақшаларында М. Ахмановтың "Екі дос" ертегісін көшпелі қойылыммен сахналады.

Жамбыл облыстық қазақ драма театры 10 қазан күні Тараз қаласындағы "Медина" балабақшасында С. Пірмановтың "Ақ күшік" ертегісін көшпелі қойылыммен сахналады.

Астана қаласының «Жастар театры» Елордамыздың 20-жылдық мерейтойына орай Тараз қаласындағы гастрольдік сапары аясында 9 қазан күні, сағат 19.00-де Жамбыл облыстық қазақ драма театрының сахнасында жазушы-драматург Болат БЕКЖАНОВТЫҢ «Өмір» атты драмасының премьерасын көрсетті. Драманың қоюшы режиссері – Қазақстанның еңбек сіңірген қайраткері, белгілі режиссер Нұрқанат ЖАҚЫПБАЙ. Көрермендер драмадан шынайы Өмір суретін көрді.

Жамбыл облыстық қазақ драма театрында 7, 8, 9, 10 қазан күндері Астана қаласының «ЖАСТАР» театры гастрольдік қойылымдарын өткізеді.
Билеттер театр кассасында сатылады. Келіңіздер, көріңіздер!
7 қазан, сағат 19.00-де - Ғ.Мүсірепов. «Жібек», мюзикл.
8 қазан, сағат 12.00, 13.00-де – Ю.Алесин. «Золушка», ертегі.
8 қазан, сағат 19.00-де – У.Шекспир. «Асауға тұсау», комедия.
9 қазан, сағат 12.00-де – Ю.Алесин. «Золушка», ертегі.
9 қазан, сағат 19.00-де – Б.Бекжанов. «Өмір»,  драма. Премьера.
10 қазан, сағат 12.00-де – Б.Соқпақбаев. «Көзіме бір көрінсең, бала  ғашық...» сахналық повесть.
10 қазан, сағат 19.00-де – Н.Жақыпбай. «Жанарымдағы жалғыз әуен» әуенге табыну.

2018 жылдың 5-қазанында өткен, Қазақстан Республикасы президенті Нұрсұлтан Назарбаевтың Қазақстан халқына кезекті әрі маңызды жолдауын, Жамбыл облыстық қазақ драма театры мен Жамбыл облыстық орыс драма театры ұжымдары тікелей эфирде тамашалады.

Жамбыл облыстық қазақ драма театрының 83-ші жаңа маусымы 2018 жылдың 3 қазаны күні жазушы-драматург Мархабат Байғұттың «Асқаровтың аққайыңдары» атты драмасының премьерасымен ашылды.

Автордың өзі айтқандай, бұл драма «Рухани жаңғыру» бағдарламасы аясындағы мақсат-міндеттерге сай, қазақ тарихындағы белгілі тұлғалардың өшпес істері мен өнегелі өмір жолдарын терең танытып, насихаттауға арналған.

Премьераны тамашалауға Жамбыл облысы әкімінің орынбасары Ерқанат Манжуов және облыстық Қоғамдық кеңес төрағасы Жандар Кәрібаев бастаған облыс, қала әкімдіктерінің басшы қызметкерлері, облыстық басқармалардың басшылары, облыстық Ардагерлер кеңесінің алқа мүшелері мен еңбек ардагерлері, зиялы қауым өкілдері, БАҚ журналистері келді.

Түркістан облысынан келген қонақтар қатарында драма авторы, жазушы-драматург Мархабат Байғұт бастаған бірқатар қоғам қайраткерлері, өнер майталмандары және еңбек ардагерлері болды. Сондай-ақ, Алматы облысы мен Меркі ауданынан Асанбай Асқаровпен қызметтес болған тұстастары, жолдастары, туыс бауырлары болды.

Қойылымда Асанбай Асқаров образын театр артисі, ҚР Мәдениет қайраткері Жүніс Әлімбеков барынша шынайы шығарса, Асқаровтың жұбайы Фатима ролін артист Индира Мұстафаева да бар шеберлігін салып, ерекше сомдап шықты. Ана бейнесін Қазақстанның халық артисі Мәкен Рахымжанова сомдады.

Сондай-ақ, зұлым тоталитарлық режим өкілдері: КПСС Орталық Комитетінің Саяси бюросының мүшесі Соломенцевті сомдаған артист, Республикалық театр фестивалінің лауреаты Мәлік Ақүрпеков, КСРО Мемлекеттік қауіпсіздік комитетінің полковнигі Золин ролін сомдаған артист Мәмбет Қожалиев, тергеуші Калиниченко роліндегі артист Жандар Қырықбаев, түрме бастығы, ішкі істер қызметі полковнигі ролінде ойнаған ҚР еңбек сіңірген артисі Асқарбек Сейілхан және тағы басқалар өз кейіпкерлерінің бейнесін барынша шынайы ашып, жеткізе білді.

Премьераны көруге келген көрермендерде шек болмады, зал лық толды. Артистер өнеріне, әсіресе Асанбай Асқаровты сомдаған театр артисі, ҚР Мәдениет қайраткері Жүніс Әлімбековтің өз кейіпкерінің қиын-қыстау, қысталаң сәттегі бүкіл болмысын, ішкі жан-дүниесін, тебіренісін, толғанысын айрықша шеберлікпен көрсете білуіне риза болған көрермендер дүркін-дүркін қол соғумен болды.

Қойылым соңында театр ұжымына облыс әкімінің ықылас гүлі табыс етілді.

Өз кезегінде драма авторы Мархабат Байғұт та сөз алып, осы қойылымды дүниеге әкелген барлық шығармашылық ұжымға шексіз ризашылығын білдіріп, Түркістан облысы мен шымкенттіктер атынан қоюшы-режиссер Қуандық Қасымовқа, қоюшы-суретші Рахат Сапаралиеваға, сондай-ақ, Асанбай Асқаровты сомдаған артист Жүніс Әлімбековке, Фатиманы бейнелеген актриса Индира Мұстафаеваға сый-сияпаттар жасады.

83 Маусымының ашылуына қызу дайындық жұмыстары жүріп жатыр. Маусымды танымал режиссер: Қуандық Қасымовтың "Асқаровтың АҚҚАЙЫҢДАРЫ" драмасының премьерасымен бастаймыз!!!